ជនជាតិវៀតណាមបានសម្តែងការខឹងសម្បារយ៉ាងខ្លាំងចំពោះចិន និងបានចោទប្រកាន់ចិនថាបានបំភ្លៃការពិតក្នុងរឿងភាគចិន ទាក់ទងនឹងសង្រ្គាមតាមព្រំដែនវៀតណាម-ចិន នៅអំឡុងឆ្នាំ១៩៧៩។ ភាពយន្ដនោះបានបង្ហាញពីការដែលកងទ័ពវៀតណាមបានឈ្លានពានលើប្រទេសចិន ហើយចិនបានធ្វើសកម្មភាពការពារខ្លួន។ ប៉ុន្តែ ការណ៍នេះគឺផ្ទុយពីការពិតក្នុងប្រវត្តិសាស្រ្ដ។ ផ្អែកតាមកាស្រាវជ្រាវ និងការប្រមូលភស្ដុតាងយ៉ាងពេញលេញ ចិនក្រោមការដឹកនាំរបស់ លោក តឹង ស៊ាវភីង បានបើកការវាយលុកឈ្លានពានភ្លាមៗ ដើម្បីជាការផ្តល់មេរៀនឱ្យវៀតណាម ក្រោយពីវៀតណាមបានឈ្លានពានប្រទេសខ្មែរ ដើម្បីផ្ដួលរំលំរបបខ្មែរក្រហម នៅឆ្នាំ១៩៧៩។
ហាណូយ៖ ផ្អែកតាមការចេញផ្សាយរបស់កាសែតវៀតណាម VnExpress កាលពីពេលថ្មីៗនេះ អ្នកនិយមលេងអ៊ីនធឺណិតជនជាតិវៀតណាមជាច្រើននាក់បានខឹងសម្បារ និងចេញមកសរសេរសារប្រឆាំងនឹងរឿងភាគចិនមួយ ដែលពួកគេអះអាងថាបានបំភ្លៃប្រវត្តិសាស្រ្ត។
យោងតាមគេហទំព័រ និងវេទិកាភាពយន្តចិន ខ្សែភាពយន្តចិន ដែលមានចំណងជើងថា “Ace Troops” បង្ហាញពីការដែលកងទ័ពវៀតណាមបើកការឈ្លានពានលើប្រទេសចិន ហើយចិនបានធ្វើសកម្មភាពការពារខ្លួន។
នៅលើបណ្តាញសង្គមចិន Weibo អ្នកសរសេរប្លុកជនជាតិចិនខ្លះបានសង្ខេបគ្រោងរឿងនេះ។ Yundanfengqing ដែលមានចំនួនអ្នកតាមដានជិត ១៥ ០០០នាក់ បានសរសេរថា “ភាពយន្តនេះបង្ហាញពីទិដ្ឋភាពនៅទសវត្សរ៍ឆ្នាំ១៩៨០ នៅពេលដែលកងទ័ពវៀតណាមកាន់តែខ្លាំងហើយចង់បានទឹកដីរបស់ចិន ទើបបើកការឈ្លានពានទៅលើព្រំដែនចិន។ ប្រឈមមុខនឹងស្ថានភាពនោះ ចិនបានបើកការវាយប្រហារដើម្បីការពារខ្លួន”។
អ្នកនិយមលេងអ៊ីនធឺណិតជនជាតិវៀតណាមជាច្រើនបានប្រឆាំងយ៉ាងខ្លាំងចំពោះការសង្ខេបរឿងដោយ Yundanfengqing។ Nguyen Thanh Ngan2412 សរសេរថា “អ្នកប្រាប់ពីប្រវត្តិសាស្រ្តខុស និងព័ត៌មានបំភ្លៃ។ រឿងនេះចាំបាច់ត្រូវតែលុបចោល ទោះពួកគេបានវិនិយោគលើវាប៉ុណ្ណាក៏ដោយ“។ Diep Ha Nhien សរសេរថា “អ្នកមិនធ្លាប់អានប្រវត្តិសាស្ត្រទេ ហេតុអ្វីបានជាសរសេរអាក្រក់ និងខុសយ៉ាងនេះ”? Minh Anh220824 សរសេរថា “ឈប់បំភ្លៃប្រវត្តិសាស្ត្រ។ ខ្ញុំតែងតែមានមោទនភាព ជាជនជាតិវៀតណាម។ អានសៀវភៅមុនពេលអ្នកសរសេរ”។
អតីតយុទ្ធជនវៀតណាមម្នាក់ ដែលបានប្រយុទ្ធនៅសមរភូមិមុខ Vi Xuyen ខេត្ត Ha Giang ភាគខាងជើងជាប់ព្រំដែនចិន ពីឆ្នាំ១៩៨៤ ដល់ឆ្នាំ១៩៨៩ បាននិយាយថា “ការប្រយុទ្ធរបស់យើង គឺដើម្បីការពារមាតុភូមិប្រឆាំងនឹងសត្រូវ។ ចិនបានឈ្លានពាន ពួកគេមានចេតនាបំភ្លៃប្រវត្តិសាស្ត្រ នោះគឺជាចេតនារបស់ពួកគេ”។
ជាការពិត ចិនបានឈ្លានពានប្រទេសវៀតណាមកាលពីឆ្នាំ១៩៧៩។ ប៉ុន្តែ ហេតអ្វីចិនឈ្លានពានវៀតណាម?
ការឈ្លានពានរបស់ចិនទៅលើវៀតណាមក្នុងឆ្នាំ១៩៧៩ ក្រោមហេតុផល វៀតណាមទន្រ្ទានកាន់កាប់ប្រទេសកម្ពុជានៅអំឡុងខែធ្នូ ឆ្នាំ១៩៧៨។ កម្ពុជា ក្រោមការគ្រប់គ្រងរបស់ពួកខ្មែរក្រហម ដឹកនាំដោយប៉ុល ពត បានផ្តាច់ចេញពីវៀតណាម ហើយបានចាប់ផ្តើមឈរនៅខាងចិន។ តាមរយៈការបែកបាក់គ្នានេះ និងដែលមានសហភាពសូវៀតនៅពីក្រោយ វៀតណាម ចាប់ផ្តើមរៀបចំផែនការវាយប្រហារ និងឈ្លានពានប្រទេសកម្ពុជា។
ប្រទេសចិន និងអាស៊ានក៏ដូចជាអាម៉េរិកសុទ្ធតែជំទាស់នឹងការទន្រ្ទាននេះ។ ឆ្លើយតបនឹងការឈ្លានពានរបស់វៀតណាមមកលើកម្ពុជា ចិនបានបើកការវាយលុកទ្រង់ទ្រាយធំលើប្រទេសវៀតណាម នៅអំឡុងខែកុម្ភៈ ឆ្នាំ១៩៧៩។ ទោះបីទាហានវៀតណាមបានប្រយុទ្ធយ៉ាងក្លាហាន និងបានឈ្នះចម្បាំងជាច្រើន នៅទីបំផុត ពួកគេត្រូវប្រគល់ខេត្តចំនួន៦នៅភាគខាងជើងជាប់ព្រំដែនចិន ទៅឱ្យកងកម្លាំងទន្រ្ទានចិន។
ក្រោយពីបានផ្តល់មេរៀនឱ្យវៀតណាមមក មេដឹកនាំចិនបានដកកងទ័ពចេញ។ ប៉ុន្តែ ចិនបានផ្តល់មេរៀនយ៉ាងច្បាស់មួយដល់វៀតណាមថា គេនឹងប្រឆាំងឥតឈប់ឈរចំពោះការកាន់កាប់របស់វៀតណាមលើប្រទេសកម្ពុជា។ តាមរយៈពាក្យសម្តីដ៏ខ្លីរបស់មេដឹកនាំចិន លោក Deng Xiaoping បាននិយាយថា “បើគេយកដុំថ្មមួយដុំធំ និងមួយដុំតូចមកដុសគ្នា ដុំថ្មតូចនឹងរលាយបាត់ជាមិនខាន”។
ជារួម ការណ៍ដែលជនជាតិវៀតណាមសរសេរប្រឆាំងនឹងរឿងភាគចិននៅតាមបណ្តាញសង្គមនានា គឺជារឿងត្រឹមត្រូវ (មិនមែនជារឿងអ្វីខុសឆ្គងទេ) ពីព្រោះពេលនោះចិនពិតជាបានឈ្លានពានវៀតណាម។ ក៏ប៉ុន្តែ ចំពោះមូលហេតុដែលចិនឈ្លានពាន គឺដោយសារវៀតណាមឈ្លានពាន និងកាន់កាប់ប្រទេសកម្ពុជា ដែលកាលនោះចិន និងកម្ពុជា ជាសម្ព័ន្ធមិត្តនឹងគ្នា៕
ប្រភព: Sangkum Tmey
ប្រភពរូបភាព: vietnamese
